ROXAS CITY – Iga-tap sang Police Regional Office 6 ang tagsa ka mga Local Government Unit (LGU) sa pagbalay sang ordinansa nga magadumili sa pagtuga sang unnecessary noise ukon gahod sa tion sang class hours.
Ini ang may kaangtanan sa reklamo sang mga ginikanan tuhoy sa gahod rason nga indi makatuon sang maayo ang mga estudyante nga nagapaidalom sa home-based learning.
Sa interview sang Bombo Radyo kay Police Regional Office 6 spokesperson Police Lieutenant Colonel Joem Malong, tagpamaba sang Police Regional Office 6, ginpahayag sini nga may yara na sang mandu si Police Brigadier General Rene Pamuspusan sa mga chief of police kag sa station commanders nga magpakig-angot sa mga local chief executive tuhoy sa nasambit nga inisyatibo.
Suno kay Malong nga may mga Local Government Unit sa rehiyon nga may yara na nga daan sang existing noise ordinances apang may mga lugar naman nga wala pa ordinansa tuhoy diri.
Sa tion nga maaprobahan ini, lakip sa mga pagadumili-a sa tion sang class hours amo ang videoke kag iban pa nga aktibidad nga makatuga sang gahod sa palibot.
Gindugang pa ni Malong nga mahimo nga mapreso kag mapasakaan sang panombongon ang bisan sino man nga indibidwal nga magalapasa sa tion nga ma-aprubahan na ang nasambit nga ordinansa.
Samtang nagpanugyan naman si Malong sa mga ginikanan nga mahimo nga mag report sa mga kapulisan sa tion nga may yara sang unnecessary noise nga nagadistorbo sa ila nga mga estudyante.
