Roxas City – Ginahulat pa sang Police Regional Office (PRO-6) ang guidelines gikan sa ila central office para sa pagsungka sang mga heinous crime convicts nga nahilway bangud sa Good Conduct Time Allowance (GCTA) law.
Ginpahayag ni PRO-6 Spokesperson Police Lt. Colonel Joem Malong nga wala pa sila sang may ginauyatan nga guidelines kag listahan sang mga convicts bangud wala pa sang may ginpadala sa ila ang National Headquarters sang Philippine National Police.
Suno kay Malong naglab-ot sa 1,227 ang mga convicts sa Western Visayas nga gin-transfer sa National Bilibid Prisons sang tuig 2016.
Nagpanawagan man si Malong sa mga convicts nga nahilway nga magsungka sa sulod sang 15 ka-adlaw nga period.
Bangud, kun mapaslawan sila nga makasungka sa sulod sang 15 ka-adlaw makabig na sila nga furgitives.
Nahibaluan nga nagapakig-angut naman sila sa Bureau of Jail Management and Penology (BJMP) angut sa status kag impormasyon sang mga crime convicts agud may basehan sila.
