Nagapati ang isa ka progresibo nga grupo nga daku ang tsansa nga ma-impeach si Vice President Sara Duterte.
Sa interview sang Bombo Radyo kay Elmer Forro, Lead Convenor sang No to PUV Phaseout Coalition Panay kag Secretary General sang Bayan Panay, iya ginpahayag nga may probable cause ang tanan nga kaso nga ginpasaka batok sa bise presidente kag indi basta isa ka political move lang.
Suno kay Forro, isa ka daku nga pagpanghangkat ang mangin desisyon sang Senado bangud kalabanan sang mga Senador ang kaalyado ni Duterte.
Pahayag pa niya, kinahanglan ang accountability ilabi na sa indi husto nga paggasto sang confidential fund, mga indi ma-eksplikar nga manggad kag paggamit sang mga pangalan sa dokumento nga makabig nga isa lang ka imbento.
Nagpanawagan man ang natungdan sa publiko nga mangin mabinantayon kag ipakigbato ang kinamatarong sa pag-angkon sang hustisya batok sa mga gapanginpulos nga mga opisyal.
