Preparado na ang Capiz Provincial Disaster Risk Reduction and Management Office (PDRRMO) sa posible pag-igo sang Tropical Depression Verbena sa probinsya sang Capiz.
Sa interview sang Bombo Radyo kay Atty. Shiela Artillero, Head sang Capiz Provincial Disaster Risk Reduction and Management Office (PDRRMO), iya ginpahayag nga nakapreparar na sila kasubong sang ila nga preparasyon sang mga nagligad nga bagyo nga nag-igo sa probinsya.
Suno kay Atty. Artillero, ginapanugyanan na ang mga pumuluyo ilabi na ang mga naga-istar sa flood prone area nga maghanda sang ‘Go Bag’ kag iban pa nga mga kinahanglanon bangud magapatigayon sang pre-emptive evacuation ang ila talatapan sa tion nga magtaas ang lebel sang tubig sa lugar.
Pahayag pa niya, nakahanda naman ang mga rice packs nga igapanagtag sa mga pumuluyo nga magapadulong sa evacuation center.
Nagpanawagan man ang natungdan nga mangin alerto sa tanan nga oras ilabi na nga indi mapaktan ang lakat sang panyempo.
