ROXAS CITY – Ginpatpat ni provincial administrator Edwin Monares ang pila ka mga balantayan nga aktibidad kadungan sang 50th Golden Thanksgiving Celebration sang gobyerno-probinsiyal nga mismo ika-50 anyos nga kaadlawan ni Capiz governor Esteban Evan ‘Nonoy’ Contreras sa Nobyembre 6, 2019.
Suno kay Monares nga nagakadapat lamang nga hatagan sang selebrasyon si Contreras bilang amay sang probinsiya.
Ginklaro man ni Monares nga indi ini basta lamang selebrasyon sang kaadlawan sang gobernador bangud sa nasambit nga kahiwatan iga-presentar man ni Contreras ang iya labing una nga State of the Province Address (SOPA) ukon ang iya nahimuan sa una nga 100 ka adlaw sini sa pwesto.
Pila man sa balantayan sa amo nga adlaw amo ang pormal nga pagbukas sang Malasakit Center sa Roxas Memorial Provincial Hospital (RMPH), pag-presentar sang mga rebel returnees sa probinsiya, kag opisyal nga paglunsyar sang sang Kabalaka Caravan Kapitolyo sa Barangay.
Suno pa kay Monares nga madamo sang halangdon nga mga opisyal nga ginalauman nga magatambong sa amo nga selebrasyon.
Isa sa nagkompirmar nga magatambong suno kay Monares amo si Senador Christopher ‘Bong’ Go kag imbitado man si Davao City Mayor Inday Sara Duterte apang indi pa mapat-od sang administrador kun magaabot ang alkalde.
Ginalauman man nga magatambong ang tanan nga mga alkalde kag mga punong barangay sa bilog nga probinsiya sang Capiz.
Mahibaluan nga ginmandu ni provincial administrator Edwin Monares ang pagtukod sang task force para sa nasambit nga selebrasyon.
Sandig sa Memorandum Order No. 167 – 2019, ginhatagan sang direktiba ang magkatuhay nga departamento sa gobyerno-probinsiyal agud makadihon sang mga programa para sa kaadlawan sang gobernador nga pagapangunahan sang Provincial Tourism and Cultural Affairs Office (PTCAO).
