Nangin madinalag-on ang sting operation nga ginpatigayon sang mga pulis sa Nonthaburi, Thailand matapos ang mga undercover officers nagpakuno-kuno nga isa ka lion dance troupe agud dakpon ang isa ka notoryus nga kawatan sang Buddhist artifacts.
Gina-akusaran ang 33-anyos nga suspek nga nagsulod sa puluy-an sang isa ka senior police officer kag nagpangawat sang malahalon nga mga butang, lakip na ang duha ka 12-inch Buddha statue nga ginabulubanta nagabalor sang masobra 2 million baht (P3.8 million).
Antes ang operasyon, makapila ka beses nga nakapalagyo si Jojo sa mga otoridad kag masami nga nagatambay sa mga templo sa Bang Bua Thong, Nonthaburi, nga nagabaligya sang mga kinawat nga mga butang.
Nagbag-o ang imbestigasyon sang nakabaton sang tip ang mga pulis nga ang suspek magasapol upod sa iya mga kaupod sa isa ka templo sa Sai Noi district sa tion sang Lunar New Year celebrations.
Agod indi mahalata sa tunga sang masinadyahon nga kapiestahan, ang mga pulis nagsuksok sang traditional lion kag dragon dance costumes kag nagsaot samtang sekreto nila nga ginapangita ang target.
Sang nakita si Jojo, madasig ini nga nadakpan sang mga otoridad sa bulig sang iya mga kaupod nga naka-sibilyan.
Suno sa Thai police, una na ini nadakpan sang makaduha ka beses kag nangin wanted bangud sa madamo nga kaso sang pagpangawat.
