ROXAS CITY – Bali ang tiil kag pilas sa kamot ang naangkon sang isa ka pulis matapos aksidente nga nabungguan ang isa ka pribado nga salakyan sa Barangay Lawaan, sining syudad.
Gindapatan sang first aid sang Capiz Emergency Response Team (CERT) ang biktima nga si police officer Ronald Rey Ordonio 31-anyos sang Barangay Tiza, Roxas City nga ginasiling kalakip sa mga pulis nga magapakigbahin sa send off ceremony sang Capiz Police Provincial Office para sa May 13 midterm election.
Apang ba-se sa pahayag ni Joseph Denisado, empleyado sang Metro Roxas Water District (MRWD) kag tag-iya sang Isuzu Trooper nga salakyan nga ang nasambit nga pulis ang nagpang-agaw sang linya matapos ginaalegar nga na-alang alang ini sang gulpi nagliko ang isa ka tricycle.
Ginaalegar nga ginlikaw ni Ordonio ang iya motorsiklo, apang nadulaan ini sang kontrol kag aksidente nga nabungguan ang salakyan ni Denisado.
Suno pa kay Denisado nga madasig ang pagpadalagan sang biktima sang iya motorsiklo sang nagluntad ang aksidente sa dalanon.
