ROXAS CITY – Patay ang katapo sang Philippine National Police, matapos aksidente nga bumungggo sa kasugata nga delivery truck sa Barangay Bolo, Roxas City, Capiz.
Ginkilala ang napatay kay Patrol Nestor Vegas Jr., 31-anyos na-assigned sa 1ST Aklan Provincial Mobile Force Companay (PMFC), kag residente sang Barangay Libas, Roxas City.
Samtang ang driver naman sang kasugata sini nga delivery truck ang ginkilala kay Rodel Avelino Sr., 46-anyos kag residente sang Barangay Lawaan, sining syudad.
Sa impormasyon nga nakuha sang Bombo Radyo nagikan sa Roxas City PNP, ginapahayag nga samtang ginasubay ni Vegas ang dalan nagikan sa Barangay Lanot kag pauli na kuntani sakay ang iya Honda PCX WW150M nga motorsiklo apang pag-abot sa lugar aksidente ini nga bumunggo sa ginamaneho ni Avelino nga Isuzu Truck, Giga Aluminum Wing Van.
Bangud sa makusog nga impact, nag-angkon sang patal nga pilas sa ulo si Vegas nga gintunaan sang iya kamatayon.
Gilayon naman ini nga ginrespondihan sang katapo sang Capiz Emergency Response Team (CERT) kag ginpadangat sa Capiz Doctor’s Hospital para kuntani sa nagakaigo nga pagbulong apang gindeklarar ini nga dead on arrival sang doctor.
Sa karun, nagapabilin sa kustodiya sang Roxas City PNP ang motorsiklo kag salakyan para sa nagakaigo nga disposisyon.
