PILAR, CAPIZ – Pilas ang naangkon sang isa ka Police Patrolman matapos nga bumunggo ang ginamaneho nga motorsiklo sa isa ka truck sa Barangay Cayus, banwa sang Pilar.
Ginkilala ang Patrolman kay alyas “Raymond”, 29-anyos kag residente sang Brgy. Minoyan, Murcia, Negros Occidental samtang, ang driver naman sang truck ang ginkilala kay alyas “Diones”, 48-anyos kag residente sang Brgy. Natividad, Pilar, Capiz.
Sa nangin interview sang Bombo Radyo kay PMAJ Alfred De Leon, hepe sang Pilar MPS, ginapahayag nga samtang ginasubay ni alyas Raymond ang dalanon sakay sang iya motorsiklo, hinali nga nabungguan sini ang isa ka truck sang ini ang nagaliso sa nawala nga bahin sang dalanon.
Dugang pa ni De Leon, padulong kun tani ang patrolman sa banwa sang Pres. Roxas sang natabo ang aksidente.
Nahibaluan nga wala nag signal ang truck nga maliso ini bangud samad ang signal light sini.
Gilayon naman nga gindala ang biktima sa isa ka pribado nga ospital para dapatan sang nagakaigo nga pagbulong.
Sa karun, yara na sa kustodiya sang Pilar MPS ang pareho nga mga behikulo para sa nagakaigo nga disposisyon.
