ROXAS CITY – Wala gid makabatyag ang pamilya Besana nga ginsulod na ang mga ini sang kawatan, Miyerkules sang kaaganhon, Hunyo 1.
Sa interview sang Bombo Radyo kay Barangay Kapitan Mabini Besana, ginpahayag sini nga nag-agi ang ginaalegar menor de edad nga suspek sa bukas nga bintana sa kwarto sang iya subang nga bata, kag nataban ang alahas kag kuwarta nga kapin P4,000.
Nagtaklas pa ang amu nga suspek sa naka-park nga salakyan kag nagpadulong sa ika-duha nga panalgan sang amu nga balay kag dumiretso sa kuwarto sang isa pa sini ka bata kag natigayon nga makuha ang P3,000 nga cash.
Sa pagpalagyo sang suspek, ginsuksok sini ang sweater sang bata ni Kapitan.
Nakit-an man sa CCTV ang pagpalagyo sang suspek kadungan sang paglabay sang duha ka mga motorsiklo nga posible nagserbe mga ‘look out’ sini.
Pagka-aga, nakit-an ang sweater kag ang wallet nga ginpabinlan sang suspek sang kwarta nga P5 nga papel kag P10 nga coins.
Nahibaluan nga sa subong nga tuig, ika-tatlo na ini nga insidente sang pagpangawat sa ila barangay kag ginapatihan nga pangayaw ang mga suspek.// Pahayag sang Kapitan nga mag-aligmat ang mga residente ilabi na sa kaaganhon bangud ina nga mga inoras ang pagpangbiktima sang mga kawatan.
