ROXAS CITY – Nagakasubo sa karon ang mga Kiwis ukon mga pumuluyo sang pungsod New Zealand sa pagtaliwan ni Queen Elizabeth II sa United Kingdom.
Sa interview sang Bombo Radyo kay Dr. Renand Fenolan Dumala-on, Bombo International Correspondent sa New Zealand, ginsiling sini nga pila sa mga pumuluyo ang nagpadala sang mga bulak sa embahada sang UK sa ila pungsod bilang simpatiya sa ginbayaan nga pamilya sang Reyna.
Suno sa doktor, yara sa karon ang Prime Minister sang New Zealand nga si Jacinda Ardern sa UK kaupod ang iban pa nga world leaders agud magtambong sa state funeral.
Ginpahayag sini nga holiday sa Setyembre 26 kag igapatigayon ang day of mourning sa bug-os nga pungsod kun sa diin pagapangunahan ini ni Ardern.
Imbitado man sila suno diri sa Auckland University kun sa diin siya nagatrabaho bilang faculty in education nga magpartisipar personal man ukon online.
Mahibaluan ginakabig nga commonwealth realm ang New Zealand bangud isa ini sa mga pungsod nga nasakop sadto sang UK, rason nga ginarekognisar nila nga Reyna sang ila pungsod si Elizabeth II.
Magapabilin ang koneksyon sang duwa ka pungsod may kaangtanan sa monarchical affairs.
Dugang pa ni Dumala-on, pag-abot sa pagsuporta kay King Charles III lakot pa ang reaksyon sang mga pumuluyo bangud yara pa sila sa estado sang pagkilala ukon transition stage.
Ang pagkabig subong sang pumuluyo kay King Charles III indi kapareho kay Queen Elizabeth II kun sa diin madamo ang nagapalangga ilabi na nga masami nagabisita ang reyna sa New Zealand.
