ROXAS CITY – Personal nga nagdangop sa istasyon sang Bombo Radyo ang pumuluyo sang Barangay San Martin, Dumalag agud ipa-bombo ang mga opisyales sang barangay bangud sa ginaalegar wala sang proyekto nga hinimuan kag wala nagaduty.
Suno kay Mr. Arvin Farinas, daw kaangay ginpabay-an na lang sang mga opisyales ang lugar bangud sa wala aksyon sa pihak sang wala-tuo nga reklamo natuhoy sa guba nga dalan kag wala naga-siga nga street light nga posible tunaan sang aksidente.
Ginareklamo man sini ang dalan nga halos matabunan na sang hilamon bangud ginaalegar wala ginatatap sang Barangay.
Dugang pa ni Farinas, sa tion nga magpadulong ini kay Barangay Kapitan Nelson Fano agud ipalab-ot ang iya concern, ginapahayag ginatulod man ini sa iban sa mga barangay kagawad kag daw kasubong ginalikawan ang isyu.
Indi man suno diri makit-an ang mga Barangay Kagawad kag si Kapitan Fano sa barangay hall magluwas lamang kun may bisita, gani mas mabudlay sa mga pumuluyo ang magpapirma ukon magkuha sang certification bangud ginapadulungan pa nila ini sa ila tagsa ka mga panimalay.
Nagalaum si Farinas, nga mabugtawan ang mga opisyales kag tatapon ang ila barangay bangud naga-antus sang ila aksyon ang mga pumuluyo.
Samtang, bukas naman ang waragwagan sang Bombo Radyo Roxas para sa mangin depensa kag sabat ni PB Fano kag mga opisyales.
