ROXAS CITY – Ginpanugyanan ni Punong Barangay Marilyn Belalo sang Barangay Binaobawan, Pilar ang mga pumuluyo nga likawan danay ang pagkaon, pagharvest, pagtransport kag pagbaligya sang panginhason matapos ang pagka-poison sang 12 tanan ka mga residente sang nasambit nga barangay.
Sa interview sang Bombo Radyo kay Belalo, suno diri posible nga magtaas pa ang numero sang na-poison ilabi na nga tahong ang masami nga sud-an sa ila lugar.
Ang mga apektado nga lugar amu ang Sitio Kawit kag Binaobawan Proper.
Matandaan nga bilog nga magpamilya sa Sitio Kawit ang ginpadangat sa ospital matapos makabatyag sang pagpangluya, pagpangbinhod sang kalawasan, pagpalanuka kag pagsakit sang ulo dala sang pagkaon sang tahong kun sa diin ang isa ka solterito ang ginbawian gid sang kabuhi.
