ROXAS CITY-Ginsabat sang punong barangay sang Barangay Baybay Roxas City ang reklamo sang isa ka ginang nga wala makabaton sang ayuda sa idalom sang Social Amelioration Program (SAP) sang Department of Social Welfare and Development (DSWD) sa Sitio Sorongon, Barangay Baybay, Roxas City.
Ginpahayag ni punong barangay Reynaldo Magallanes nga nakalista ang pangalan ni Angelita Caro sa mga makabaton sang bulig pinansyal apang pag-abot sa balidasyon sang City Social Welfare and Development Office (CSWDO) ginkakas ang pangalan sini bangud natukiban nga nagatrabaho ang bana ni Caro sa gobyerno.
Gindugang pa ni Magallanes nga gin-abisuhan sini ang ginang nga magpadulong sa talatapan sang ahensya agud magpaathag.
Samtang ginkumpirmar man ni Magallanes nga wala malakip sa una nga hugnat nga alokasyon sang tunga sa sako sang bugas si Caro bangud nagsaylo ini sang lugar nga gina-istaran.
Bangud wala nakabaton sang bugas, ginpakamaayo sang kaingod balay ni Caro nga tungaon ang tunga sa sako nga bugas agud makatilaw man ang ginang.
