ROXAS CITY – Matigdas nga ginsabat sang kapitan sang Barangay Cadio banwa sang Panitan ang mga alegasyon nga may kaugalingon ini nga housing units sa Medalla Milagrosa Ville nga nahamtang sa Barangay Timpas sang nasambit nga banwa.
Sa interview sang Bombo Radyo kay Punong Barangay Lenie Degoma, ginpahayag sini nga wala sang kamatuuran ang mga nagalapta nga istorya nga nagapanag-iya ini sang housing unit apisar nga anay amay man sang barangay ang bana sini.
Apang aminado ini nga nakaangkon sang mga units sa nasambit nga pabahay ang duha sini ka mga kabataan bangud kwalipikado ang mga ini matapos ginpaidalum sa validation sang National Housing Authority (NHA).
Mahibaluan nga nagatrabaho sa Metro Manila ang mga ginikanan sang isa ka apo sini kabangdanan nga nagaisahanon lamang ini nga nagatinir sa nasambit nga unit.
Dugang pa sini nga boluntaryo sini nga ibalik ang unit kun magadesisyon ang NHA nga pagabawion ini.
Matandaan nga sandig sa pagpanalawsaw sang Bombo Radyo Roxas, ginapahayag nga madamo sang mga pumuluyo ang indi kwalipikado nga pamilya apang nakaangkon sang housing units.
Sa paglibot sang News Team, natukiban nga may mga benepisaryo nga anay mga kapitan kag may mga housing units man ang mga anak sini.
Mahibaluan nga naturned-over na sang National Housing Authority (NHA) ang mga housing unit sa Local Government Units sang Panitan rason nga nagaapelar ang pila ka mga indibidwal nga kun mahimo maimbestigaran ni Panitan Mayor Katherine Dequiña-Belo kun ngaa nalakip sa mga nakabaton sang units ang indi man makabig nga mga kwalipikado.
