ROXAS CITY – Pagarespetuhon ni Punong Barangay Castor Holce Bialen sang Barangay VIII, sini nga syudad ang mangin desisyon sang bag-o nga administrasyon sang provincial government kun pagabawion ang mga ‘Kabalaka’ transport vehicle.
Ini ang ginpahayag ni Kapitan Bialen, sang mainterview sang Bombo Radyo.
Suno diri, magasuporta ini sa mangin administrasyon ni Governor-elect Fredenil ‘Oto’ Castro kun ano ang makapamaayo sa ila barangay.
Apang, suno diri nga dako ang nabulig sang nasambit nga behikulo sa ila nga barangay ilabi na sa pagpatrolya.
Nahibaluan nga pinaagi sa resolusyon nga ila ginpapasar nga naga-request sang amu nga salakyan, natigayon nga mahatagan sila sang administrasyon ni outgoing Governor Esteban Evan Contreras.
Matandaan nga plano sang Sangguniang Panlalawigan nga imbentaryuhon ang 56 ka mga transport vehicle kag pagahibaluon kun ano ang nangin criteria sa pagpanagtag sini sa mga kabarangayan sa probinsya.
