ROXAS CITY – Idangop ni Punong Barangay Manuel Aninang sa Ombudsman ang ginaalegar indi patas nga listahanay sang pagalan sang mga nakabaton sang emergency cash transfers kag pagbuhin sang ayuda nga ginbaton sang mga benepisyaryo.
Sa interview sang Bombo Radyo kay Aninang, iya ginapahayag nga wala nag-agi sa iya ang mga pangalan sang mga biktima sang bagyo bangud si Barangay Kagawad Alysa Obliga amo ang nanguna sa listahanay sang mga makabaton sang P10,000 kag P5,000 nga ayuda halin sa Department of Social Welfare and Development (DSWD).
Suno sa Punong Barangay, madamo sang mga reklamo nga nag-abot sa iya nga ginbuhinan sang nagalista sa ila barangay ang cash assistance nga ginhatag sang ahensya sang gobyerno.
Magluwas sina, pahayag niya, gin-una pa sang barangay kagawad lista ang iya nga pamilya kag himata apisar nga ang iban indi man taga Olotayan.
Dismayado si Punong Barangay Aninang sa distribution sang ayuda bangud daw kaangay nga “under control” ang DSWD kag wala man lang gin-verify kun matuod nga residente sang Olotayan kag mga biktima sang bagyo ang mga nalista nga pangalan.
Bukas naman ang Bombo Radyo sa paathag ni Barangay Kagawad Obliga.
Interviewed by: Bombo Jessa De Los Santos
via Bombohanay Bigtime
