Queen Elizabeth II, ginasaulog ang ika-70 ka tuig nga pagpungko bilang reyna sang Buckingham Palace, UK – BINC

ROXAS CITY – Masadya kag matawhay ang selebrasyon sang Queen’S Platinum Jubilee ukon ika-70 ka tuig nga pagpungko bilang reyna ni Queen Elizabeth II sa Buckingham Palace sa United Kingdom.

Ini ang ginkumpirmar ni Bombo International Correspondent (BINC) Roland Crispo sang mainterview sang Bombo Radyo.

Suno diri si Queen Elizabeth II ang labing una nga British Monarch nga nagaselebrar sang platinum jubilee sumugod sang pagpungko sini sa trono sang Pebrero 6, 1952 matapos magtaliwan ang amay nga si King George IV.

Kabahin sang selebrasyon sang 96-anyos nga reyna ang six-minute flypast sang masobra 70 ka mga aircrafts sa nagkalain-lain nga sangay sang Arm Forces of the United Kingdom sa queen’s birthday parade.

May yara man sang konsiyerto nga ginpatigayon sa palasyo nga ginakalakipan sang kilala nga mga banda kag sikat nga mga performers.

Gintambongan man ini sang nagkalain-lain nga nasyon nga kabahin sang United Kingdom Empire.

Suno kay Crispo, nagpalab-ot man sang pagtamyaw sa reyna ang mga world leaders kaangay nanday Pope Francis, President Joe Biden kag Emmanuel Macron.

Kaangut diri, alerto naman ang mga kapulisan sa mga posible insidente nga matabo samtang ginaselebrar ang 70-years record breaking nga paggahum sang reyna sang United Kingdom.

Sa pihak nga bahin, apisar nagataas ang numero sang kaso sang monkeypox sa pungsod, wala ini ginakahangawan sang mga British bangud sa once in a lifetime nga selebrasyon sa UK.