Ginbaton ni Ramil Madriaga ang hangkat ni Davao City Mayor Sebastian “Baste” Duterte nga magtapungulay sila nga duha.
Sa sulat nga ginpadala sang iya abogado nga si Atty. Raymund Palad, ginpabutyag ni Madriaga ang iya sabat sa hangkat ni Baste.
Suno sa iya, bugal para iya ang hangkat gikan sa anak sang anay presidente.
Dugang pa sini nga preso siya subong, limitado ang iya paghulag, kag 58-anyos na, gani indi na nagakabagay sa iya ang physical confrontation, kag nagsuhestyon nga mas maayo nga atubangon niya ang alkalde bilang patas.
Apang suno kay Madriaga, handa siya sa gihapon nga makig-away, apang sa idalom sang pila ka mga kondisyon, lakip na ang pagsolbar sang mga panumbungon nga iya ginapangatubang.
Bilang alternatibo, ginduso pa sini nga hiwaton ang away sa iya lokasyon sa Annex 2 sang Camp Bagong Diwa, sa diin suno sa iya handa siya nga atubangon ang alkalde.
Madumduman nga nag-umpisa ang pagbayluhanay sang mga pahayag matapos ginhangkat ni Mayor Baste si Madriaga sa “no holds barred” nga away, kasunod sang pagsambit sang iya pangalan sa supplemental affidavit nga ginpresentar sa hearing sang House Justice Committee may kaangtanan sa impeachment proceedings batuk kay VP Sara.
