ROXAS CITY – Nagpaathag ang pinuno sang Roxas City Communications Group natuhoy sa nagalapta nga video sa social media kun sa diin makit-an ang pagsabtanay sang mga katapo sang ila opisina kag mga Returning Overseas Filipinos (ROF’s) nga naka-quarantine sa Hortus Botanicus sa Barangay Milibili, Roxas City.
Suno kay Mr. Melvin Galagate, una sila nga nagpadulong sa amo nga pasilidad agud tsekyaron kun may mga ROF’s kag Locally-Stranded Individuals (LSI’s) nga naka-schedule magpaidalom sa rapid test.
Apang sa ila pag-abot, naabtan nila nga may presensiya sang kapulisan sa pasilidad rason nga sila ang nagpangusisa.
Diri kag nahibaluan nga nagpanawag sang responde sa kapulisan ang mga katapo sang amo nga pasilidad bangud sa pagpamilit sang isa ka lalaki nga ROF nga makapauli bangud sa panindugan nga 17 diyas na ini nga naga-tenir sa amo nga lugar.
Apang sa pag-tsekyar sang records, nahibaluan nga 15 diyas pa lamang ini sa amo nga pasilidad.
Suno kay Galagate nga nagkalma man ang amo nga lalaki matapos nila nga ginpaathagan sang mga rason kun ngaman indi pa ini mapaguwa bangud wala pa nag-abot ang resulta sang iya nga swab test.
Sang nagtawhay na ang sitwasyon, tuman na lamang ang kakibot sang mga katapo sang RCCG sang hinali na lamang sila nga ginsinggitan sang mga babaye nga ROF’s.
Suno kay Galagate nga gin-akusaran sila sang mga ini nga atrasado na sila ginakuhaan sang swab tests.
Bisan ginapaathag sa mga ini ang proseso suno kay Galagate, nagasinggitan gihapon ang nasambit nga mga ROF’s kag kasubong indi na mahambalan.
Magluwas diri luyag pa sang nasambit nga mga ROF’s nga patinluan ang ila ginahigdaan nga mga hulot apang suno kay Galagate, maathag sa ila house rules nga ang tagsa-tagsa sa mga ROF’s kag LSI’s ang responsable sa pagtinlo sa ila kaugalingon nga higdaan.
Nagpanindugan si Galagate nga dako ang nangin bayolasyon sang nasambit nga mga ROF’s sa house rules bangud sang nagasinggitan sila sa mga katapo sang RCCG, nagtumpok-tumpok ang mga ini kag wala ma-obserbar ang physical distancing.
