ROXAS CITY, CAPIZ – Ginpakigbahin sang Roxas Component City Police Station “RCCPS”, ang hugot nga mga pagsulundan sa mga buluthuan nga kinahanglan respetuhon kag sundon sang tagsa ka estudiante.
Sa interview sang Bombo Radyo kay Police Lieutenant Colonel Rogelio L. Tomagtang Jr., Chief of Police sang Roxas Component City Police Station, iya ginpahayag nga sa suporta kag direktiba ni Provincial Director Police Colonel David L. Cachumbo Jr., padayon ang pagpatuman sang mga tikang para mapalig-on ang seguridad sa tagsa ka eskwelahan.
Suno kay Tomagtang, ginatan-aw nga may positibo nga epekto sa seguridad sang mga estudyante, manunudlo, kag iban pa nga personnel ang istrikto nga pagpatuman sang mga polisiya kag pagsulundan sa sulod kag palibot sang mga buluthuan.
Ginpahanumdom man niya ang mga estudyante, ginikanan, kag guardians nga respetuhon kag sundon ang tagsa ka polisiya nga ginapatuman sang eskwelahan, ilabi na ang mga patakaran nga may kaangtanan sa seguridad, agud malikawan ang mga indi ginapaabot nga insidente nga mahimo magresulta sa kahalitan, kakulba, ukon peligro.
Pahayag pa ni Tomagtang, wala sang dapat ikakulba ang publiko basta nagasunod sa mga ginapatuman nga pagsulundan kag nagapabilin nga responsable sa pagpakigbahin sang impormasyon.
Samtang, ginpasiguro niya nga handa ang kapulisan, sa bulig sang iban pa nga law enforcement agencies, sa pagresponde sa bisan ano nga insidente ukon impormasyon nga may kaangtanan sa seguridad, ilabi na sa mga lugar nga may mataas nga volume sang mga estudyante.
Dugang pa sang natungdan, ang mga polisiya kag pagsulundan sang eskwelahan kinahanglan respetuhon kag sundon sang tanan halin sa tion nga magsulod sa school premises, bangud ini isa sa mga importante nga tikang para mapabilin nga hilway, luwas, kag organisado ang palibot sang mga buluthuan.
