ROXAS CITY – Nag-angkon sang kinagamo sa tunga sang mga opisyales sang Barangay Banica sining siyudad kag katapo sang Roxas City Emergency Response Team sa idalom sang City Disaster Risk Reduction and Management Office (CDRRMO) sa Banica Public Cemetery.
Ini matapos nga may pila ka mga residente ang nagpahayag nga may isa ka COVID-19 suspect case ang ginlubong sa nasambit nga patyo takna alas 8 sang gab-I, Setyembre 20.
Gilayon naman nga ginpadulongan sang tanod nga on duty ang porsyon kun sa diin ginlubong ang COVID19 suspect case kag naabtan nila mismo ang katapo sang RCERT kag pamilya sang napatay nga residente sang Barangay Dayao sining siyudad.
Sa interview sang Bombo Radyo sa wala na ginhingadlan nga tanod nga gin-usisa nila ang katapo sang RCERT nga naglubong sa suspect case kag ginpangitaan sang dokumento ukon mga ID’s nga pamatuod lamang nga katapo sila sang CDRRMO.
Apang sa baylo nga sabton sang ensakto ginapahayag nga daw indi pa maayo ang panabat sang mga ini sa ila.
Ginpahayag sang amo nga tanod nga nakasigurado ini nga katapo sang CRDDMO ang naglubong sa suspect case bangud nakasuksok pa ini sang T-shirt sang RCERT.
Dugang pa sini nga ginsabat pa sila sang isa ka lalaki nga taga RCERT nga may yara sang permiso ang paglubong sa nasambit nga suspect case.
Apang, natingala ang mga opisyal sang nasambit nga barangay kun ngaa gab-I na ginlubong kag wala pa sang suksok nga mga PPE’s ang mga ini.
Mahibaluan nga wala na nila naabtan ang paglubong sa COVID-19 suspect bangud nasulod na ini sa nitsu.
Samtang, gin-usisa naman ni Barangay Kagawad Michael Agana ang mga katapo sang RCERT angut sa paglubong sini bangud wala man sang may nagpalab-ot sa ila sang impormasyon nga may yara sang igalubong sa nasambit nga patyo.
Ginpahayag pa sini nga ensakto man ang iya nga pag-usisa sa mga taga-RCERT apang sa baylo nga magsabat sang ensakto daw kasubong nga wala sila respeto sa mga opisyal.
Ginpangitaan niya pa ini ID apang ginhatagan lamang sila sang numero nga sila na lamang ma-contact sa opisina bangud legal man ang paglubong sa COVID-19 suspect.
Nabalaka lamang ang mga opisyal sang barangay bangud malapit sa mga residente ang ginlubngan sang nasambit nga COVID-19 suspect case kag wala pa nagasuksok sang mga PPE’s ang mga katapo sang RCERT nga naglubong sini.
Mahibaluan nga makapila ka beses na ini nga ginahimo suno sa mga opisyal nga wala nagapakig-angut ang opisina sang CDRRMO sa mga barangay officials sang amo nga barangay nga may yara sang ilubong sa nasambit nga patyo.
Indi pa mabal-an nga positibo sa nasambit nga balatian ang ginlubong nga indibidwal bangud pending pa ang resulta sang iya nga swab test.
