ROXAS CITY — Gin-aku sang Nonito Aguirre, Sr. Command sang New People’s Army – Eastern Panay nga sila ang responsable sa pagsulod sa balay kag pagdis-arma sa isa ka mag-amay sa Brgy. Sibariwan, Dumarao, Capiz.
Base sa mensahe nga ginpadala sang rebelde nga grupo sa Bombo Radyo pinaagi sa Facebook, ginsulod nila ang puluy-an nanday Aurelio Longno, 84-anyos kag Nonilon Longno, 54-anyos agud dis-armahan ang mga ini sadtong Hunyo 6, 2016 banda 5:30 sang hapon.
Gintuad man sang grupo nga nakuha nila kay Aurelio ang isa ka .9mm caliber pistol, isa ka .22 caliber magnum, mga bala sang 12 gauge shotgun.
Suno pa sa ila, nakuha man nila sa balay ni Nonilon ang isa ka .38 kalibre nga armas kag isa ka homemade shotgun.
“Ang ini nga tikang ginhimo sang NPA para tapnaon ang paggamit ni Aurelio Longno sang nasambit nga mga armas sa iya mapiguson kag mahimuslanon nga pagkontrol sa mga mangunguma kag pagpang-agaw sang duta. May ara man impormasyon nga nabaton ang NPA nga may mataas nga kalibre sang armas nga ginprenda sa iya sang isa ka notorious nga katapo sang sindikato nga tumandok man sang Dumarao, Capiz,” suno sa pahayag sang rebelde nga grupo.
Mahibaluan nga base sa impormasyon nga nakuha sang Bombo Radyo, una nga ginsulod sang masobra 20 ka mga rebelde nga NPA ang balay ni Aurelio kag masunod nga ginsulod ang balay sang iya anak nga si Nonilon.
Gintuad man sang mag-amay nga ila ang amo nga mga armas luthang bangud ginapangaman nila ini bilang pangdepensa sa ila kaugalingon.
Suno man diri nga naksuksok pa sang itom nga T-shirt nga may ngalan nga ‘CIDG’ ang mga rebelde kag may dala nga mga backpack.
