ROXAS CITY – Nagdepensa ang pamunuan sang grupo nga Phillipines Recaneli Mother International Foundation: The Voice for Global Solutions on Poverty Association INC., sa akusasyon nga ang ila grupo nga nagapanukot sang kwarta sa ila mga gina-recruit nga mga miyembro ang isa lamang ka scam ukon pagpanunto.
Suno sa national spokesperson sang grupo nga si Lina Deslate, indi sang scam kag wala man nagapanunto ang ila grupo kag boluntaryo lamang ang pagpasakop sa ila grupo.
Suno sa iya kapin sa apat ka tuig na nga naga-eksister ang ila grupo kag ang tinutuyo sini amo nga mapalapnag sa mga pumuluyo ang impormasyon may kaangtanan sa ila mga kinamatarung sandig man sa 1987 Philippine Constitution.
Sa subong nagapangita sila sang mga miyembro nga magabug-os sa 50,000 ka mga trabahador nga amo ang magatrabaho sa pagatukoron nga 79,000 hectares nga Avenue Square for All Nations sa Subic, Zambales kun sa diin ang tagsa sa ila ang magabaton sang tres-mil pesos nga sweldo tagsa ka adlaw sa sulod sang lima lamang ka oras nga pagtrabaho.
Magasugod suno kay Deslate ang trabaho sa tion nga maproklamar na sang ila pinuno nga si Recaneli nga nakabase sa luwas sang pungsod nga sarang na nila nga mapatuman ang proyekto nga mahuman sa sulod sang kapin tatlo lamang ka tuig.
Apang indi naman makapasalig si Deslate kun san-o mahinabo ini nga proklamasyon.
Ang tagsa nga luyag mangin kabahin sang grupo ang magabayad sang P700 nga registration fee.
Suno pa kay Deslate, rehistrado ang ila grupo sa Securities and Exchange Commission ukon SEC apang may yara lamang sang mga luyag nga magsamad sa ila.
Mahibaluan nga sang tuig 2015 nagpaguha sang advisory ang SEC batuk sa grupo nga suno sa ahensiya ang indi sang rehistrado sa ila agud magpangolekta sang kantidad.
