Sa una nga adlaw sang hearing, pormal nga nagpagwa sang subpoena ang House Committee on Justice agud ipilit ang pagsumite sang Statements of Assets, Liabilities, and Net Worth (SALN) ni VP Sara Duterte, subong man ang record sang imbestigasyon may kaangtanan sa iya gina-alegar pamahog sa kabuhi sang Pamilya Marcos.
Sa boto nga 34 pabor, isa ang nagkontra, kag wala sang abstention, ginpabakod sang komitiba ang mosyon ni House Committee on Good Government and Public Accountability Chairperson kag Manila Third District Rep. Joel Chua.
Katuyuan sang nasambit nga mosyon nga magpaguwa sang subpoena duces tecum sa Office of the Ombudsman nga amo ang opisyal nga naga-uyat sang nasambit nga mga dokumento.
Sakop sang subpoena ang mga SALN ni Duterte sang ini ang alkalde sang Davao City halin 2007 tubtub 2013 kag 2016 tubtub 2022, subong man ang iya subong nga SALN bilang Vice President humalin 2022 tubtub 2025.
Magluwas sa manggad ni Duterte, gin-aprubahan man sang komitiba paagi sa voice vote ang pag-issue sang separado nga subpoena duces tecum nga gindirekta sa National Bureau of Investigation (NBI).
Ginamanduan sang mga mamalidha ang NBI nga i-release ang tanan nga records sang ila imbestigasyon sa nagviral nga video kun sa diin nakita kag nabatian si Duterte nga nagapaguwa sang death threats batuk kay President Ferdinand Marcos Jr., First Lady Liza Araneta-Marcos, kag House Speaker Martin Romualdez.
