Ginpamatian na sang Regional Trial Court (RTC) Lapu-Lapu City, ang mosyon nga ibasura ang warrant of arrest nga ginpasaka batok sa contractor nga si Sarah Discaya angot sa P96.5-million nga “ghost” flood control project sa Davao Occidental.
Naghingyo si Atty Michael David nga ibasura ang arrest warrant batuk sa iya kliyente nga una nga nadakpan kag napreso sang nagligad nga bulan may kaangtanan sa ginaalegar flood control project sa probinsya.
Nagfile man sang motion ang mga legal counsel ni DPWH District Engineer Rodrigo Larete kag walo ka iban pa nga mga opisyal sang Department of Public Works and Highways (DPWH) Davao Region agud ibasura ang impormasyon kag warrants of arrest batok sa ila mga kliyente.
Ginrason sang mga abogado nga wala sang hurisdiksyon ang RTC Branch 27 sang Lapu-Lapu City sa pagbista sang kaso bangud indi mataas nga opisyal ang mga akusado, kag may salary grade lang nga mas manubo sa 27. Ang pinakamataas nga opisyal nga ginpasakaan sang kaso amo si Larete nga may salary grade nga 25.
Kaangut sini, nag-file man sang motion si Ombudsman Mindanao prosecutor Atty Marie Josephine De Vera nga ibalik ang venue sang hearing sa RTC Branch 20 sang Malita, Davao Occidental.
Ginalauman man magapaguwa sang resolusyon ang RTC Lapu-Lapu City nahanungod sa mga mosyon antes ang Enero 13, 2026, ang gintalana nga petsa sang arraignment sang tanan nga mga akusado sa nasambit nga kaso sang ghost flood control project.
