Ginakabig sang International Criminal Court accredited lawyer nga normal nga tikang ang liwat nga panawagan sang International Criminal Court prosecutors para sa anay kag aktibo nga mga pulis kag iban pa nga law enforcement agencies nga mag-testify agud mapabaskog pa ang kaso may kaangtanan sa war on drugs sang Duterte administration.
Sa interview sang Bombo Rady kay Atty. Gilbert Andres, iya ginpahayag nga luyag sang International Criminal Court nga makatipon ang full proof pinaagi sa pag-engganyo sang insiders, lakip na ang active kag former law enforcement officers, nga mangin testigo.
Suno kay Atty. Andres, mahimo nga may yara na sang circumstantial evidence ang prosecutors, apang nagapangita pa ang mga ini sang direct witnesses nga makapaathag sang maayo kag maka-link sa natabo nga pinatyanay sa war on drugs sa idalom ni anay Presidente Rodrigo Duterte kag posible sa iban pa nga mga suspek.
Pahayag niya, makahatag sang direkta nga koneksyon ang eyewitnesses nga makabulig sa pagpamatuod sang responsibilidad.
Ginlaragway pa ni Atty. Andres ang ICC prosecutors nga mahinalungon kag ginasiguro nga solid ang imbestigasyon.
Dugang pa sang natungdan, ang panawagan sa dugang nga testigo ang pamaagi man para sa ICC nga mapadayon kag mapabaskog pa ang imbestigasyon samtang ang mga biktima kag ila pamilya ang nagalaum pa nga makaangkon sang hustisya.
