Ginpabugal sang isa ka retired veteran ang mga kaupdanan sini sa kaisog kag kabakod nga ginpakita sang tion nga ang pungsod Pilipinas yara pa sa idalom sang gahom sang mga Hapon.
Kadungan sang pagselebrar sang Araw ng Kagitingan sa probinsya sang Capiz, indi lamang ang mga nagtaliwan nga soldado ang ginpasidunggan kundi sila man nga mga nagkalabilin pa tubtob subong.
Sa interview sang Bombo Radyo kay Retired Colonel Hannibal Lipardo, Region 6 Veteran President and Member Veterans Federation Supreme Council, iya ginpahayag nga bugal gid para sa ila nga hubon diri sa probinsya nga ipakigbahin sa publiko nga nagaisahon lamang ang probinsya sadto nga tion nga wala sang nakahalo nga amerikano nga soldado sa pagpalayas sa mga Hapon.
Suno kay Hannibal, apisar sa kakulang sang mga armas sadto nga tion, nahimo gid sang mga Pilipino nga mangin hilway halin sa mapintas nga gahom sang mga Hapon.
Pahayag niya, ang amo nga hitabo ang indi gid dapat nga malipatan tubtob subong ilabi na sang mga bag-ong tubo apisar nga nangin moderno na ang kalibutan.
Nagapanawagan naman ang natungdan nga kuntani ibalik ang Good Manners and Right Conduct agud nga mas palanggaon pa sang mga bag-ong tubo ang pungsod Pilipinas.
