ROXAS CITY – Mas ginpabaskog pa sang Rotary Club of Roxas City ang kampanya sang Department of Health batok sa balatian nga Polio kadungan sang Coronavirus Disease ukon COVID-19 Pandemic.
Nahibaluan nga nagpaguwa sang mando ang DOH nga pabaskugon ang kampanya batok sa Polio kun sa diin magapatigayon sang polio supplemental immunization kag nationwide measles sa Oktubre 24, 2020.
Sa interview sang Bombo Radyo kay Dr. Maria Gepilano, Rotarian Doctor in Charge sang City Health Office, iya ginpahayag nga may yara na sang nahamtang nga mga midwife ukon health personnel sa tagsa ka mga health centers agud maghatag sang vaccination ukon oral polio vaccines.
Suno kay Gepilano, wala sang dapat kahangw-an ang mga ginikanan bangud nga ang bakuna nga ginahatag sang ahensya ang nag-agi sa tul-id nga pagpanalawsaw, ginagamit sa nagkalain-lain nga pungsod kag napamatud-an nga epektibo.
Dugang sang natungdan, mataas ang posibilidad nga maka-angkon sang Polio ang mga kabataan nga wala nabakunahan gani importante ini para sa tanan partikular na sa mga naga-edad sang lima katuig panubo.
Nagpanugyan naman ini nga indi magkahadlok nga pabakunahan ang ila mag kabataan bangud tuman ini ka-importante sa tanan agud malikawan ang anuman nga sahi sang balatian.
