ROXAS CITY – Ginpausisa na sang alkalde sang siyudad sang Roxas ang ginaalegar anomaliya sa thumb mark sang isa ka senior citizen sa Social Amelioration Program (SAP) form sang City Social Welfare and Development Office (CSWDO).
Suno kay City Mayor Ronnie Dadivas nga matapos nakalab-ot sa iya ang nasambit nga isyu, gilayon niya ini nga ginpa-verify.
Apang matapos nga ginpausisa, ginpahayag sang alkalde nga wala man sang nakuha nga kwarta sa nasambit nga programa pinaagi sa ginaalegar pag-manihar sang thumbmark sang na-disqualify nga senior citizen.
Ini bangud blangko man ang payroll nga klaro suno sa alkalde nga wala sang pag-release sang P6, 000 nga ayuda nga natabo.
Apang suno kay Dadivas nagapabilin nga bukas ang sinuman nga indibidwal, grupo ukon ahensiya pananglitan nga tsekyaron ang mga dokumento sang CSWDO bangud public document man ini.
Mahibaluan nga ginkompirmar mismo sang Capiz Provincial Crime Laboratory nga wala nagsantu ang thumbmark sang senior citizen nga si Margarita Andrada sa thumbmark sa likod nga porsyon sang nasambit nga pormas.
Ini ang rason nga nagtulod kay Andrada agud ireklamo ang amo nga talatapan bangud nagaduda ini nga may nag-claim sa gihapon sang nasambit nga ayuda apisar nga gin-disqualify na siya bilang benepisyaryo.
Mahibaluan nga nagpakig-angut naman ang pulisya sa Department of Interior and Local Government (DSWD) kag CSWDO para makakuha sang specimen sa handwriting sang empleyado nga nag-assist kay Andrada.
Sa tion nga may makita nga anomalya ang pulisya, pasakaan nila sang kaso nga perjury ang yara sa likod sang nasambit nga iregularidad.
Mahibaluan nga wala naka-avail si Andrada sang amo nga ayuda bangud isa ini ka Government Service Insurance System (GSIS) pensioner.
