Ginaayam na sa karon sang mga kapulisan ang mga foreigner nga nagpangbudol sa pila ka balaligyaan sa Roxas City.
Sa interview sang Bombo Radyo kay Roxas City PNP Chief PLTCOL. Lumyaen Lidawan, ginatinguhaan nila sa karon nga ma-locate agud madakpan ang amu nga mga foreigner nga nagpangbudol.
Matandaan nga pila ka balaligyaan sa syudad sang Roxas ang nabiktima kag isa na diri ang isa ka tindahan sa Barangay Cagay kun sa diin natigayon gid nga mataban sang foreigner nga lalaki ang P10,000.00 nga para kun tani sa dialysis sang isa ka mister.
Suno pa kay PLTCOL Lidawan nga ang modus sang suspek amu nga mabakal sang bottled water kun sa diin mapamangkot ini kun ano ang itsura sang kwarta sang Pilipinas kag ila dayon gina-offeran nga baylohan sang 50 dollar apang indi man ini maghatag.
Dugang pa sini nga base sa salakyan sang mga suspek nagikan ang mga ini sa Metro Manila kag may posibilidad nga yari pa sa syudad sang Roxas bangud sa nagahilapit nga Sinadya Festival.
Panugyan ni Lidawan sa publiko nga mangin aware kag indi mag-entertain sa sining bag-o nga modus agud indi mabiktima.
