ROXAS CITY – Masobra 100 ka mga pulis sang Roxas Component City Police Station ang gin-deploy sa nagkalain-lain nga mga lugar sa syudad kasunod sang pag-obserba sang Tigkalalag.
Sa interview sang Bombo Radyo kay Police Chief Master Sergeant Ramil Arcangeles, Spokesperson sang Roxas Component City Police Station, iya ginpahayag nga magluwas sa Roxas PNP, yara mana ang nagkalain-lain nga units sang kapulisan nga nagabulig sa pagpabilin sang kalinong kag katawhay sang palibot ilabi na sa mga patyo, terminal, pantalan kag paluparan.
Suno kay Arcangeles, ginadumilian ang pagdala sang kutsilyo, armas ukon ano man nga sahi sang hinganiban, makahulubog nga ilimnon, speaker kag gambling paraphernalia sa pagsulod sa patyo.
Nagpangabay man ini sa publiko nga indi gid magsulod sa patyo kun yara sa impluwensya sang makahulubog nga ilimnon bilang pagrespeto man sa mga nagtaliwan kag mangin sa mga himata nga nagabisita.
Dugang pa sang natungdan, kinahanglan laygayan man sang mga ginikanan ang ila kabataan nga indi pagkuhaon ang mga kandila nga bag-o lang ginsindihan sa mga pantyon sa baylo maglisensya gid sa himata sang nagtaliwan.
