ROXAS CITY – Nadakpan sa akto sang mga katapo sang Phillipine Coast Guard (PCG) Roxas ang isa ka sakayan-pandagat nga napanag-iyahan sang isa ka pulis nga nagapatigayon sang ilegal nga pagpangisda sa kalalawran nga sakop sang Barangay Olotayan, Roxas City.
Ini ang ginpahayag ni Lt. Commander Edison Diaz, ang station commander sang PCG-Roxas sang mainterview sang Bombo Radyo.
Nadakpan sa akto nga nagapatigayon sang ilegal nga aktibidad ang sakayan-pandagat nga ginapanag-iyahan ni Hernane Ignacio, 38 anyos sang Barangay Mongpong, sining siyudad.
Sakay sang amo nga sakayan ang boat captain nga si Arnel Caplasa, 42 anyos, kaupod ang tatlo ka mga crews nga sanday Jobert Alayon, 46 anyos, Histiso Caplasa, 46 anyos, Cristobel Tabuloc Sr., 45 anyos, lunsay mga residente sang Barangay Libas.
Suno kay Diaz nga nadakpan ang amo nga sakayan may kapin sa 185 metros ang antad gikan sa isla sang Olotayan.
Ang nasambit nga maritime patrol operation sang hubon ang kasunod sang mandatu ni City Mayor Ronnie Dadivas nga maga-augment ini sa pagpatrolya sa kalalawran nga sakop sang siyudad.
