ROXAS CITY – “Very good news kag welcome development ang pagtaliwan ni Communist Party of the Philippines-New People’s Army-National Democratic Front (CPP-NPA-NDF) founder nga si Jose Maria ‘Joma’ Sison.
Ini ang ginpahayag ni Ka-Winnie Noblizo pinuno sang Sentrong Alyansa ng mga Mamamayan para sa Bayan (SAMBAYANAN)-Capiz, sang mainterview sang Bombo Radyo.
Masubo lamang suno diri, bangud wala ini napaatubang sa Korte kag wala napamatbatan sang iya ginhimo nga krimen batuk sa pumuluyo.
Gindugang pa sini, nga ‘deserve’ ni Sison ang iya pagtaliwan bangud masobra na sa 54 katuig ang iya pagsabwag sang kalalat-an kag iban pa nga pagpanabotahe kag malawig na nga tuig ang iya pagpa-antos sa mga pumuluyo, kun sa diin, 35,000 ka mga kabuhi sang sibilyan ang nadula, 15,000 diri ang kabuhi sang mga kapulisan kag suldado batuk sa mga giyera nga nagluntad sa bug-os nga Pilipinas.
Mensahe ni Noblizo nga sa karon, kinahanglan sang pumuluyo nga maghugpong kaupod ang gobyerno padulong sa kalinong kag pag-uswag sang pungsod.
Matandaan nga nagtaliwan si Sison sa edad nga 83, matapos ang duha ka semana nga pagka-confine sa ospital, sa The Netherlands.
