Posible nga maglab-ot sa P300 tubtob P500 million ang kinahanglanon nga pondo para sa emergency repair sang San Juanico Bridge sa Eastern Visayas, sandig sa una nga pag-estimate sang Office of Civil Defense (OCD).
Ginsiling ni OCD Administrator Usec. Ariel Nepomuceno nga ginatun-an sang gobyerno kun mahimo gamiton ang pondo sa Disaster Risk Reduction and Management (DRRM), bangud wala pa sang alokasyon gikan sa Department of Public Works and Highways (DPWH).
Nahibaluan nga sa ulihi nga assessment sang DPWH nga may problema sa structural integrity sang tulay, kabangdanan agud dumilian anay ang mga salakyan nga sobra sa tatlo ka tonelada ang bug-at.
Ginapahanumduman man ang mga motorista nga mag-agi lamang sa centerline sang tulay, isa-isa ang pag-agi, kag sundon ang mga traffic advisory sa lugar. Bilang alternatibo, ang mga mabug-at nga salakyan ay mag-gamit sang RORO ports kasubong sang sa Tacloban, Calbayog, Ormoc, Maasin, Naval, kag iban pa.
Yara sa blue alert status sa karon ang OCD – Eastern Visayas kag Regional Disaster Risk Reduction and Management Council (RDRRMC) bilang pag-preparar sa posible nga paglala sang sitwasyon.
Ginrekomendar naman sang Samar PDRRMC ang State of Emergency sa probinsya.
Mayo 18, subong nga Dominggo bawal naman ang mga pedestrian nga nagatabok sa tulay, sa kabaylo sila ang magasakay sa mga coaster ukon mga mamag-an nga mga salakyan kabahin sang pagsiguro sa ila nga kaluwasan.
Madumduman nga ang San Juanico Bridge, ang gintindog sadtong tuig 1969 kag natapos sadtong tuig 1973, ang ika-tatlo nga pinakamalaba nga tulay sa pungsod, nga naga-angot sa mga isla sang Samar kag Leyte.
