Pormal nga nagpabalhag sang reklamo si Sangguniang Bayan Member Esperidion Pelaez sang Sigma, Capiz matapos ang gina-alegar pagpangharas sa iya sa sulod sang Session Hall.
Sandig sa impormasyon nga nakuha sang Bombo Radyo, natabo ang insidente hapon sang Nobyembre 10, 2025, nagpadulong si Pelaez sa Public Order and Safety Office (POSO) para magpakig-angot sa empleyado nga si Stephen Orillanes apang sa tunga sang ila nga pag-istoryahanay nakabati sila sang komosyon sa pihak nga hulot gani gilayon nila ini nga ginkadtuan.
Didto kag nakita niya nga may hiligut-anon sanday Sangguniang Bayan Member Fernando Capapas, Sangguniang Bayan Member Thomas Lagulay, kag Vice Mayor Stephen Alayon nahanungod sa pagpadayon sang ila Regular Session, bisan may Executive Order si Mayor Dante Rizal Eslabon nga naga-suspend sang klase kag trabaho sa banwa.
Suno pa kay Pelaez, ginpahayag ni Vice Mayor Alayon nga may kaugalingon sila nga desisyon bilang lain nga departamento apang nagpamatok si Capapas kag ginkuwestiyon kon ngaa wala sila ginahatagan sang kopya sang Executive Order.
Dugang pa niya, nagdaku sini ang iya nga tingog kag nagmando nga magkuha sang kopya sang executive order si Pelaez sa opisina ni Mayor Eslabon.
Diri na kag nga nagsugod ang komosyon, ginliab kag ginhana-an nga pagasumabagon si Pelaez ni Capapas nga ginpunggan sa pagpatunga ni Sangguniang Bayan Member Lagulay.
Samtang, naka-angkon sang pilas sa abaga si Sangguniang Bayan Member Lagulay, matapos maigo sang siko ni Sangguniang Bayan Member Capapas.
Ginakabig naman nga verbal harassment ni Pelaez ang ginhambal ni SB Capapas kag pagahatagan sang legal nga aksyon.
Gilayon naman nga nagbiya si Pelaez sa Session Hall agud indi na magdaku pa ang tensiyon kag kinagamo.
