ROXAS CITY – Magapapasar sang isa ka resolusyon ang Sangguniang Panlalawigan nga nagapamalabag sa plano sang Metro Roxas Water District (MRWD) nga magbakal sang bulk water nagikan sa pribado nga supplier para mahatagan sang bastante nga suplay sang tubig ang mga kunsomidor sa probinsiya.
Ini ang ginkompirmar ni Board Member Jonathan Sonny Besa sang mainterview sang Bombo Radyo.
Ginpahayag ni Besa nga wala nagapabor ang bug-os nga Sangguniang Panlalawigan sa plano sang talatapan bangud madamo sang nakita nga disbentaha ang konseho sa tion nga madayon ang ginaplano nga bulk water purchase sang MRWD.
Suno kay Besa nga dako ang posibilidad nga mapirde ang MRWD sa tion nga madayon ang nasambit nga plano.
Magluwas diri, dako man ang posibilidad nga may yara sang igapatuman nga rate increase sa balayran sa tubig.
Mas ginakunsiderar ni Besa ang ginaduso sang technical working group nga magtipon sang pondo kag amat-amaton nga kay-uhon ang mga pasilidad sang MRWD nga indi na kinahanglan nga mag-utang pa kag magbakal sang tubig sa isa ka pribado nga supplier.
Samtang naga-apelar si Besa sa MRWD nga indi na pagdayunon pa ang nasambit nga plano kag mahimo nga tun-an anay sang talatapan ang epekto sini.//
Nagapati naman si Besa nga pinaagi sa pagkay-o sang mga pasilidad, magablik sa maayo nga serbisyo ang MRWD agud nga indi na kinahanglan nga mag-utang pa ukon magbakal sang tubig sa isa ka pribado nga supplier.
