Nangin generally peaceful ang pag-obserba sang Semana Santa subong nga tuig suno sa Capiz Police Provincial Office
Suno kay PCPT. Merry Chris Dela Cruz, Police Information Officer sang Capiz Police Provincial Office, ginpahayag nga sandig sa ila nga pag-monitor sa bug-os nga Semana sang pag-obserbar sang Semana Santa 2025 sa probinsya sang Capiz nagresulta ini sang malinong kag matawhay.
Suno pa kay Dela Cruz, nga wala sang may nabalhag nga anuman nga major nga insidente ang ila nga talatapan sa pagsugod sang Semana Santa sumugod sadtong Abril 13 (Palm Sunday) tubtob Abril 20 (Easter Sunday).
Sa pihak nga bahin, ginakasubo man sang talatapan ang narekord nga drowning incident kag road accident kun sa diin may tatlo ka mga indibidwal ang ginbawian sang kabuhi sa tion mismo sang Semana Santa.
Mahibaluan, nga sa pagsugod sang Holy Week, nag-implementar sang komprehensibo nga security plan ang Capiz PPO pinaagi sa pag-deploy sang PNP personnel nga yara sa 90% ang kabug-usan nga numero sini, kag pagpahamtang sang 88 tanan ka mga Police Assistance Desk agud nga mag-asister kag magbantay sa palibot agud nga mapabilin ang kalinong kag katawhay.
Samtang, nagapasalamat naman ang Capiz Police Provincial Office sa tanan nga mga personnel sa pag-tsekyar sa palibot nga nagresulta sa peacefull nga pag-obserbar sang Semana Santa sa probinsya sang Capiz kasubong ginapahanumdom man sini sa tagsa-tagsa nga ipabilin ang malinong kag matawhay nga palibot sa tanan nga oras.
