ROXAS CITY – Temporaryo nga ginpauntat ni Mayor Dante Eslabon ang konstruksyon sa proyekto nga Memorial park sang LGU sa Poblacion Sigma Capiz.
Sa interview sang Bombo Radyo kay Mayor Dante Eslabon ginpahayag sini nga may nakita ini nga anomalya sa amo nga proyekto rason ginpauntat ya ini.
Sa pagkamatuod suno diri, dapat natapus na ang pagpaubra sang sementeryo sang 2022 kag naturn over na sa LGU sang Sigma.
Dugang pa sang alkalde ang nasambit nga proyekto ang ginpondohan sang P42 milyones kung sa diin gin-utang ang P37 milyones diri sa bangko nga pagabayaran sang ila LGU sa sulod sang pila ka tuig nagikan sa era sang banwa.
Dugang pa ni Eslabon nga natukiban man sini nga wala gihapon masaylo sa munisipyo ang titulo sang duta sa pihak nga nabayaran na ang tag iya sang sini.
Ginapatawag naman ni Eslabon ang Contractor nga MBM Construction para ipaathag ang rason sang pagkadelay apang wala pa ini sang nangin sabat. #
