Ginhatagan pagtamod ni Senate President Pro Tempore Ping Lacson nga indi pagtugutan sang Senado ang 2025 national budget, nga iya ginlaragway nga “corrupt to the core,” nga i-reenact sa 2026.
Suno kay Lacson, ini ang rason kon ngaa nagapatuman sang mga tikang ang mataas nga kamara agud mapasiguro ang transparency sa paghinun-anon sang ginaduso nga budget, lakip na ang livestreaming sang bicameral conference committee.
Ginpanindugan sang senador nga kinahanglan nga bag-uhon sang senado ang deliberation schedule matapos nagtuhaw ang pila ka mga isyu sa paghinun-anon sang nasambit nga hagna.
Gintumod niya ang pagpalawig sang deliberasyon sa pangkabilugan nga prinsipyo sang badget halin sa isa ka adlaw pakadto sa tatlo ka adlaw—lakip ang mga isyu nga nagtuhaw sa tion sang paghinun-anon sang badyet sang National Irrigation Administration (NIA).
Apang suno kay Lacson, may posibilidad nga mapadasig ang proseso bangud sa mga reporma nga ila ginapatuman, lakip na ang livestreaming sang bicam kag pagdumili sa mga “alien” items, bangud ini ang makapugong sang mga insertions sa hagna.
