Nagsabat si Senador Christopher “Bong” Go sa akusasyon batuk sa iya sang Office of the Prosecutor of the International Criminal Court (ICC) sa diin ginhingadlan ini nga co-perpetrator ukon kaupod ni Former President Rodrigo Duterte sa kaso nga crimes against humanity may kaangtanan sa maduguon nga war on drugs.
Sa pahayag nga ginpaguwa sang Senador kahapon nga adlaw, Pebrero 14, ginpahayag sini nga subong lang niya nahibaluan ang mga alegasyon nga ginpasaka batuk sa iya suno sa nasaad sa redacted version sang Document Containing the Charges nga gin-isyu sang ICC halin sa Office of the Prosecutor sang Pebrero 13.
Hugot man nga ginpanginwala sang Senador ang mga alegasyon nga lubos nga wala sang basehan, biased, unfair kag wala sang kaangtanan sa iya papel kag responsibilidad sang nagserbe siya bilang Special Assistant ni Former President Duterte halin Hunyo 2016 tubtob Oktubre 2018 subong man bilang Executive Assistant sang Alkalde sang Davao City halin 1998 tubtob 2016.
Ginpanginwala man sang Senador ang indi matuod nga akusasyon nga nagserbe siya bilang Chief of the Presidential Management Staff, bangud wala gid siya naka-uyat sang nasambit nga posisyon.
