ROXAS CITY – Padayon sa gihapon ang search and retrieval operation sang mga otoridad matapos nga ginaalegar nalumos ang isa ka senior citizen sa isa ka suba nga sakop sang Brgy. Angub, banwa sang Cuartero.
Ginkilala ang biktima kay Felix Delfin, 83- anyos, residente sang Barangay Poblacion Takas sang nasambit nga banwa.
Suno sa impormasyon nga nakuha sang Bombo Radyo kay Mr. Ronald Guillermo, Municipal Disaster Risk Reduction and Management Officer sang Cuartero, nakita sang isa ka pumuluyo nga ginkilala kay Malou Magno, ang senior citizen nga nagapangayo sang bulig samtang gina-anod sang baha takna alas 3:00 kahapon nga adlaw.
Dugang pa sini nga kaina lamang sang aga nagreport ang pamilya nga wala sa gihapon makapauli ang ila himata nga si Delfin sang naglakat ini kahapon, alas 7:00 sang aga.
Bangud diri, gilayon nga ginsugudan ang search and retrieval operation.
Suno naman sa impormasyon nga nakuha sa Cuartero MPS, masami nga nagalakat sa ila panimalay ang senior citizen bangud ba-se sa iya pamilya malipaton na ini bangud sa katigulangon.
Sa karon, bululigay nga ginapangita sang Provincial Disaster Risk Reduction and Management Office (PDRRMO), Capiz Emergency Response Team (CERT), kaupod ang kooperasyon sang Coast Guard Sub-Station Ivisan, BFP Cuartero, Cuartero PNP, kag mga opisyales sang Brgy. Angub.
