ROXAS CITY-Arestado ang isa ka senior citizen nga nagabaligya sang indi lisensyado nga armas-luthang sa ginkasa nga entrapment operation sang gintingob nga puwersa sang Criminal Investigations and Detections Group-Capiz, Pilar Municipal Police Station, 1st Capiz Provincial Mobile Force Company, Highway Patrol Group kag 602nd Maritime Police sa Sitio Kalubihan, Barangay Natividad, Pilar, Capiz.
Ginkilala ang nadakpan nga si Frankelino Cuñada, 60-anyos, residente sang nasambit nga lugar.
Nakuha sa posesyon ni Cuñada ang isa unit sang calibre .38 nga armas-luthang, isa ka unit sang pistolized shotgun kag P4,500 nga marked kag boodle money.
Suno kay Police Major Christopher Arthemeus Devaras hepe sang CIDG-Capiz, kapin sa isa ka semana nga ginmonitor sang mga kapulisan si Cuñada.
Sa karon nakahunong na sa karsel sang CIDG-Capiz si Cuñada kag natalana nga pasakaan sang panumbungon nga paglapas sa R.A. 10591 ukon Comprehensive Firearms and Ammunition Regulation Act.
