Nag-landfall na ang Tropical Depression Verbena sa Bayabas, Surigao del Sur, suno sa Philippine Atmospheric, Geophysical and Astronomical Services Administration (PAGASA).
Ang sentro sini naobserbahan sa Jabonga, Agusan del Norte alas kuwatro sang hapon nga may kabaskugon nga hangin nga 45 km/h kag pagmadlos nga tubtob 75 km/h, kag nagahulag pakatundan sa kadasigon nga 30 km/h.
Samtang, ginpataas man sang state weather bureau ang Tropical Cyclone Wind Signal No.1 sa pila ka mga probinsya kalakip na ang Mindoro, Romblon, Palawan, Visayas, Negros, Leyte, kag Mindanao.
Nagpaandam man ang PAGASA sang mabaskog nga hangin sa iban nga lugar bangud sa kombinasyon sang Verbena kag Northeast Monsoon.
Ginalauman nga magatabok si Verbena sa Caraga Region subong nga gab-i, kag madasig nga maghulag sa ibabaw sang Visayas kag northern Palawan, kag posible man nga magbaskog antes magsulod sa West Philippine Sea.
Ginpanugyanan ang mga residente sa apektado nga lugar nga sundon ang evacuation orders kag makig-angot sa lokal nga panguluhan.
