ROXAS CITY – Magasugod na buwas nga adlaw ang pagparehistro sang SIM card sa tanan nga Telecommunications Company.
Ini ang ginpahayag ni Engr. Leah Doromal, OIC-Regional Director sang National Telecommunications Commission (NTC) Region-VI sang mainterview sang Bombo Radyo.
Suno kay Doromal, agud makarehistro, bisitahon lamang ang portal sang mga services provider kag e-fill out ang kinahanglan nga datos kaangay sang pangalan, address, birthday kag magpresentar sang isa ka government valid ID.
Ang pagparehistro ang gintunga sa duha ka pamaagi, online kag offline.
Ang online amu ang pagparehistro sa portal sang mga service providers samtang ang offline ang para sa mga remote areas nga nabudlayan maka-access sang internet kag cellphone.
Suno diri, magapaktukod sang pasibilidad ang ahensya agud mahatagan sang ligwa ang mga pumuluyo nga makaparehistro nga yara sa remote areas.
Pahayag ni Doromal. nga magadugay sa sulod sang 180 diyas ang pagparehistro apang suno diri wala dapat sang kabalak-an ang indi makaabot sa gintalana nga adlaw bangud posible pa ini maka-extend sang dugang nga 120 diyas.
Ginalauman naman sini nga sa una nga adlaw sang pagparehistro may yara sang matabo nga aberya apang ginapromisa sini nga madasig ini nga maresolba kag ma-improve sa masunod nga inadlaw.
Samtang, magapangatubang naman sa nagakaigo nga penalidad ang madakpan nga nagagamit sang sala nga impormasyon ukon naga-usar sang pagkakilanlan sang isa ka persona.
Nagapati si Doromal, nga supisyente ang ginatalana nga adlaw agud makarehistro ang tanan nga pumuluyo sang pungsod.
Pananglitan, indi makaparehistro ang isa ka indibidwala otomatiko nga madeactivate ang simcard sini kag kinahanglan sa sulod sang 5 ka adlaw ma reactivated agud indi dalayon nga mangin depektibo.
Dugang pa sang opisyal nga humalin sa karon, kinahanglan na sang ID kun magbakal sang SIM card.
