CAPIZ – Nagpahanumdom ang Simbahan Katolika nga mangin mapinasalamaton sa tanan nga bugay nga nabaton subong nga tuig.
Sa interview sang Bombo Radyo kay Very Reverend Monsignor Rufino Reggie Pamposa, Vicar General sang Archdiocese of Capiz, iya ginpahayag nga ang Bag-ong tuig ang tanda sang bag-o nga umpisa sang pagpangabuhi kag kahigayunan nga bag-uhon ang mag malain nga nagaka-andan.
Suno kay Very Reverend Monsignor Pamposa, pinasahi man nga selebrasyon ang pagsaulog sang Bag-ong tuig bangud kadungan sini ang pagkomemorar man sang solemnidad sang pagka-iloy sang Birhen Maria.
Pahayag pa niya, magaselebrar man ang Archdiocese of Capiz sang Diamond Jubilee Year nga tanda sang malawig na nga kontribusyon sang Simbahan sa pagpahimpit sang pagtuo sang mga Katoliko nga Capiznon.
Nagpanawagan man ang natungdan sa tanan nga ibilin na ang mga kalain sang buot, pag-ilinaway kag paghisa-ay kag saulogon ang bag-ong tuig nga may paghiliusa, pagpalangga, paghidait pagpangamuyo.
