Isa ka motorista gikan sa Zhejiang, China ang nag-viral online matapos ginpakigbahin ang iya tumalagsahon nga experience sa bag-o niya bakal nga Xiaomi SU7 Max, isa ka high-end nga electric smart car kun sa diin masami nga naga-alarm ang “driver fatigue warning system” sang salakyan bangud abi sang system nagapiyong siya pero natural lang nga tuman ka singkit sang iya nga mga mata!
Suno kay Mr. Li, masami siya nga nakabaton sang audio kag visual nga warning samtang nagamaneho, nga nagasugo sa iya nga mag-focus kag mangin alerto. Pahayag pa sini nga wala man siya natuyo ukon distracted, apang liwat-liwat nga naga-alarm ang reminder, pati na ang mensahe nga “Focus on driving, pay attention to safety” sa dashboard.
Sang ulihi, natalupangdan sini nga kada buksan siya sang todo ang iya mga mata, nagadula ang warning. Apang kun untaton niya ang pagmudlat sang iya mata, liwat nga nagatunog ang warning.
Ang kasubong nga insidente indi lang si Mr. Li ang naka-experience. Madamo pa sang iban nga Chinese netizens ang nagkomento nga naeksperyensyahan man nila ang pareho nga problema sa nagkalain-lain nga Chinese car brands kasubong sang Lynk & Co kag Deepal.
Mangin pila ka Xiaomi SU7 owners, nag-report nga nagreklamo man sila sa manufacturer angut sa sini nga isyu.
Nagpaguwa sang pahayag ang Xiaomi kag gin-athag nga ang insidente tuga sang “fatigue monitoring” feature sang SU7 Max. Ang system nagagamit sang camera sa manibela agud bantayan kun alerto ang driver.
Kun masal-an nga natuyo ukon wala nagalantaw sa dalan, automatic nga nagahatag ini sang warning kag kun indi mag-response sa warning sang kotse, puwede nga pahinayon kag pauntaton mismo ang dalagan sini.
Ginpahayag naman sang Xiaomi nga puwede nga i-off ang monitoring feature sa settings, apang wala ini gina-recommend bangud sa kaluwasan.
Sa pihak sini, nangin sentro sang diskusyon sa social media ang isyu, ilabi na para sa mga Chinese nga natural nga singkit ang mga mata nga sa karon nangin pagtilaw ang paggamit sang modern nga teknolohiya sa salakyan.
