ROXAS CITY – Yara na sa kustodiya sang City Crisis Center ang isa ka menor de edad nga nadakpan sang isa ka traffic auxiliary kag security guard nga nagasimhot sang rugby sa isa ka bakante nga lote sa Arnaldo Boulevard, Roxas City.
Sa impormasyon nga nakuha sang Bombo Radyo News Team nadakpan sang traffic auxiliary nga si Ricky Ortiga ang 14-anyos nga solterito nga nagasuyop sang rugby nga nasulod sa isa ka plastic bottle sang soft drink sa bakante nga lote sang nasambit nga lugar gani nagpangayo ini sang responde sa duha ka mga security guard.
Sa bulig sang mga security guard natigayon nga madakpan ang solterito nga gikan pa sa probinsya sang Iloilo.
Sa pagpangusisa sang Bombo News Team nahibaluan kay alyas Toto nga gintudlo-an lamang ini sang iya mga barkada sa pagsimhot sang rugby nga mga lunsay man menor de edad.
Gindugang pa ni alyas Toto nga apat sila nga magbarkada ang nagasimhot sang rugby apang siya lamang isa ang nadakpan.
Sa karon nagapadayon naman ang imbestigasyon sang Roxas City PNP Women and Children Protection Desk (WCPD) section sa solterito.
