ROXAS CITY – Kasubong isa ka malain nga damgo ang natabo sa isa ka soltero sang Barangay Culajao, Roxas City matapos mabiktima sang mapaniplang nga pagpalangga sang isa ka dalaga gikan sa Barangay Prosperidad, San Carlos City, Negros Occidental.
Nagkilalahay si Charlito Balasa, 25 anyos kag si Inday Miraluna, 24 anyos pinaagi sa social media site nga Facebook sadtong bulan sang Pebrero kag diri nadalman ang balatyagon ni Balasa para sa dalaga.
Nangin mag-‘on’ ang duha tubtob sa nagpadulong sa siyudad sang Roxas si Miraluna kag si Balasa ang nagpabutyag man sang kahandaan nga mapakaslan ang dalaga.
Bangud sa tuman nga pagpalangga gintinguhaan ni Balasa nga makatipon sang kwarta bangud luyag sini nga pakaslan si Miraluna.
Nakatipon si Charlito sang kapin P13, 000 kag sadtong bulan sang Setyembre nagdesisyon ang duha nga magpauli sa lugar ni Miraluna kag nagplano nga magpakasal sa bulan sang Disyembre.
Apang nakibot na lamang si Charlito nga sadtong Oktubre 2, nangindulaan si Miraluna nga wala man lang naglisensiya dala ang iya cellphone kag kwarta nga nagalab-ot sa P10, 000.
Bangud wala na gid nagpauli si Miraluna, gin-usisa ni Charlito ang ginikanan sang dalaga kag didto iya natukiban nga indi lamang siya ang una nga nabiktima sang mapaniplang nga pagpalangga ni Miraluna.
Indi halos makapati si Charlito sa ginhimo ni Miraluna kag suno diri nga ginbilinan lamang siya sang dalaga sang P100 para iya nga pamasahe pauli sa siyudad sang Roxas.
