ROXAS CITY – Yara na sa isa ka punerarya ang bangkay sang soltero matapos nga nalumos sa fishpond sa Barangay Matinabus, Sigma, Capiz.
Ang indi na luyag paghingadlan sang iya himata nga biktima ang nagapang-edaron sang 18-anyos kag ginapahayag nga may ginasupreher nga Epilepsy.
Sandig sa nakuha nga impormasyon sang Bombo Radyo sa mga katapo sang kapulisan, nga mga ala-una kahapon sang hapon, Pebrero 16, sang nagpadulong ang biktima sa isa ka payag kun sa diin nahamtang ang punong, naghuluhigda ini sa papag, apang posible gin-abot sang iya balatian, kag posible nahulog nga gintunaan sang iya pagkalumos.
Gintinguhaan pa ini nga salbaron sang mga katapo sang MDRRMMO kag Sigma Response Unit sang nagresponde sa lugar, antes ginpadangat sa pinakamalapit nga ospital apang gin deklarar nga dead on arrival sang doktor.
Nagapati ang pamilya nga wala sang foul play sa natabo sa biktima.
